أفكار مصحبانى
أفكار كتيرة مصاحباني
وانا ماشي
من بعد نور الفجر ما يشقشق
تلقاني دايماً أحب الـمشي وحداني
اسمع نداكي ..
بيخرم طبلة اوداني
عاوز أجيلك
يِكَتِّفْني ندى البرسيم
أفكار كتير متكوِّمة
ومتبّتة ف الراس
تقتل سنين العمر وتعاند
وانا ساند
على كتافي سبايت حزن
ما تقُلش غاوي أعيش العمر متذنّب
اسمع وساويس الألم
وارسمها قصيدة شعر
كل الملامح يا بلد فيكي اتمحت
يا عم ياللي
بتروي الزرع بالمواتير
يا هل ترى لسه بتحلم بالشادوف
وبلفّة الطنبورة
وبليلة تسهرها ف عز البرد
غارس همومك في قلب الطين
وحلان ..
تعجن ساعات الوقت مش يائس
ليه النهارده رميت الصبر مش قادر
ـــــــــــــــــــــــــــــــــــــــــــــــــــــــــ
التصنيفات : غير مصنف |
